De hegepryster

De 78-jarige Walter Williams had woensdag een hartstilstand gekregen en was doodverklaard. Zijn lichaam lag klaar om te worden gebalsemd, maar begon tot verrassing van de begrafenisondernemer te trappelen in zijn lijkzak. Mogelijk haperde zijn pacemaker. (Volkskrant, 1 maart 2014)

Der binne fansels legio ferhalen fan minsken dy’t dea wiene en dochs noch wer ‘wekker’ wurden binne. Foar guon minsken is it bewiis dat it weropstanningsferhaal fan Jezus net ûnmooglik is.  In haperjende pacemaker is lykwols alhiel wat oars as in krusiging en in spear yn ‘e side krije. Jezus wie oan ‘e ein fan goede freed echt wol dea en opstean út de dea is fysyk ienfâldichwei net mooglik.

Wat kin der dan wol bard wêze?

De Romeinen wiene fansels de baas yn Judea. De praefectus siet lykwols net yn Jeruzalem, mar yn Ceasarea. Allinnich mei Peaske kaam er nei Jeruzalem om ta te sjen op it oarderlik ferrin fan de feestdagen. It deistich bestjoer oer de Joaden lei by de hegepryster. Dy wist dat de preafectus him yn dizze dagen op ‘e fingers sjen soe, oft er it allegearre goed oan koe.

Jezus, dy’t it grutste part fan de tiid yn Galilea wie, wie ien fan de tûzenen Joaden dy’t mei Peaske nei Jeruzalem ôfreizgen. Der wiene al aardich wat folgelingen en de oankomst fan Jezus yn Jeruzalem soarge dan ek foar aardich wat opskuor.

Hegepryster Kajafas hie der alhiel gjin belang by dat Jezus rôp fan dat er de kening fan de Joaden wie en sa syn gesach en dat fan de Romeinen oantaaste. Wat soe praefectus Pilatus der net fan tinke? Hy liet Jezus oppakke, brocht him foar Pilatus dy’t ûnder druk set waard om de deastraf út te sprekken (dat koe Kajafas sels net) en Jezus waard krusige.

Dat wie lykwols net de ein fan it ferhaal, want der wie in grutte Galileeske Jezus-movement yn de stêd en dat soe ek noch wolris foar problemen soargje kinne as dy allegearre by it grêf omhingjen bliuwe soene. It wie de baas en soargje dat dy Galileeërs fuort gean. Alles wiist der op dat Kajafas in snoad plan makke hat: hy hat it deade lichem fan Jezus ut it grêf helje litten.

Der binne oanwizingen yn de bibel dy’t soks oannimlik meitsje. De autoriteiten hiene it behear fan it grêf oernommen (Matth. 27:64). Dat joech harren fansels alle gelegenheid om it lichem fan Jezus der út te heljen. Op in oar plak fertelle de evangeeljes fan de Joadske prysters dy’t de Romeinske wachters omkeapje. Wêrom soene hja dat dwaan? Der is mar ien ferklearring: de wachters wisten dat de prysters it lichem fuorthelle hiene. Dy hiene der belang by dat dat net bekend wurde soe (Matth. 28:11-15).

Yn twa fan de evangeeljes is der spraken fan minsken (in jongfeint yn Markus 16:5, twa manlju yn Lukas 24:4) dy’t de froulju fertelle dat Jezus út de deaden opstien is. Yn dy tiid waard soks noch wol leaud: de profeten Elija en Eliza hiene ek wolris in deade wer ta libben brocht. Dizze boadskippers by it grêf sille grif helpers fan de hegepryster west ha. Net allinnich fertelden hja fan de weropstanning, ek makken sy de folgelingen wiis dat hja nei Galilea weromkeare moasten om't Jezus sein hie dat er dêr hinne soe..

Sa hie Kajafas de boel wer aardich ûnder kontrole: de lieder dea, de folgelingen werom nei Galilea.