Frysk yn social media

In opfallende konklúzje nei oanlieding fan it ûndersyk fan Lysbeth Jongbloed nei it gebrûk fan it Frysk yn social media (Leeuwarder Courant, 4 desimber 2015). Guon minsken wolle wol Frysk skriuwe, mar men wit oer it generaal net hoe’t it moat en al gau wurde sms-kes en Facebookberjochten mar fonetysk skreaun. Konklúzje fan it ûndersyk, sa lês ik, is: ‘Correct geschreven is het meestal niet, maar verder gaat het goed met het gebruik van de Friese taal op sociale media’. Ynteressant. Giet it goed mei de Fryske taal as it net korrekt skreaun is?

De molke is soer, mar fierder is it bêst te drinken. It is hjoed in reinder, mar fierder is it in moaie simmerdei. Spitich fan dy Lee Harvey Oswald, fierder wie it in noflik auto-ritsje.

Friezen nimme harren taal net serieus. Sa. Dan haw ik it mar in kear sein. Ik begryp de portee fan it ûndersyk fan Jongbloed wier wol: it is moai dat der safolle minsken graach korrekt Frysk skriuwe wolle soene. Dat is spitigernôch lykwols heel wat oars as dat it goed giet mei it Frysk. It giet no ien kear net goed mei it Frysk. Koartlyn skreaunen Arjen Versloot en Eric Hoekstra noch dat it Nederlânsk de oerhearskjende taal yn Fryslân oan it wurden is. De wurdskat fan Frysktaligen rint tebek en guon jonge minsken hawwe gjin aan fan wat de korrekte Fryske tiidwurdfolchoarder oan ‘e ein fan in sin moat wêze.

Ik haw in brutsen skonk, mar fierder kin ik noch knap drave. Spitich fan dy iisberch, fierder wie it in prachtige maiden-voyage. Nee, it komt net faak foar dat in parasjute net iepen giet, mar fierder hat er wol genoaten fan syn sprong.

It liket der op dat alle ûndersiken nei de steat fan it Frysk fan de ôfrûne jierren, konkludearje dat it goed giet. Ik haw it earder skreaun en ik tink der oer, lykas de Romeinske senator Cato, en einigje tenei al myn stikjes mei deselde meidieling: en fierder bin ik fan betinken dat it Frysk de ein fan de ieu net helje sil.