'Resepsje Omrop Fryslan, mei Jantsje'

Nee, dat hie de dame fan Omrop Fryslân yndied net sein, dat it foar tillevyzje wie, doe’t ik har ûnthjitte dat ik der foar soargje soe dat der in reaksje jûn wurde soe. No woe se ien foar de kamera hawwe! Ik wie sels yn Julianadorp en dus net beskikber. Ik besocht kollega’s te beljen. De iene wie yn Maastricht, de oare siet op in terras, in tredde woe net en de leste naam de tillefoan net op. Net ien….
​
Fan it stran of belle ik wer mei de redaksje: 'resepsje Omrop Fryslân, mei Jantsje.' Sa’n trije of fjouwer kear ferlear ik de ferbining en moast wer op ‘e nij belje: ‘resepsje Omrop Fryslân, mei Jantsje.’ De oplossing wie in tillefoanysk ynterview foar de radio en dan soene se in stikje lûd derút brûke yn de TV reportaazje, mei yn byld in foto fan ‘yours truly’, dy’t ik dan fansels noch wol even e-maile moast. En ik soe wat dwaan moatte oan de ferbining, want foar in tillefoanysk ynterview koene we it net hawwe dat de line de hiele tiid ferbrutsen wurde kinne soe.

Ik rûn de dunen wer yn, Ellen en de bern efter littend op it strân. Ik stapte op in ûnbekende man ôf en sei: ‘vraag me niet waarom, maar ik heb per direct een portretfoto van mezelf nodig, zou je even een foto van mij willen maken?’

Sportyf naam er myn tillefoan oer, seach der even nei en sei tsjin syn soan: ‘ich weiss nicht wie ich das mache, kannst du mahl sehen?’
​
Boppe op de dunen hie ik better berik en stie út de wyn in ‘e lijte fan in bunker. De Omrop belle. Wy wachtten oant de helikopter oerfleaun wie en diene it ynterview, mei útsjoch oer de polder tusken Julianadorp en Den Helder. Dernei mailde ik de foto fan de Dútske soan en sa kin it wêze dat myn earste tillevyzje optreden yn jierren beheind bleaun is ta in blikkerich lûd mei in net al te professionele foto yn frijetiidsklean, nommen op in parkeerplak yn de dunen fan Julianadorp.