Boerekoalstronksteradiel

De trije gemeenten Dongeradeel, Ferwerderadiel en Kollumerland sille fusearje en sykje derom in nije namme. Humoristyske fynsten as ‘Sintraleassië’ wurde net wurdearre, it sil wol wer wat droechs as Lauwerslân wurde.

Dokkum

​En dat is spitich, want dizze krimpstreek kin wol in ‘boost’ brûke en in goede namme docht dan in soad. Freegje in Brabander wêr’t Ferwerderadiel leit en hy hat der grif noch nea fan heard. Dat moat oars en dat kin oars. Der binne ommers fan dy plaknammen dy’t elkenien wolris brûkt, om’t se foar mear steane as de namme fan in geografysk ôfbeakene gebiet. Tink oan Timboektoe en Vladivostok (stiet foar ein fan de wrâld) of Shangri-La en Arcadië (stiet foar paradys op Ierde) of – de alderbêste – Mekka (Brussel is it Mekka foar strip-leafhawwers).
 
No is it probleem fansels dat sokssoarte plaknammen dy betsjutting fertsjinne ha en safier is Kolferdong noch net. We kinne it lykwols wol ek omdraaie: we sykje in útdrukking dy’t elkenien wolris brûkt en dat soe de nije gemeentenamme wurde kinne.
 
Sa hat men yn de Rânestêd de mûle altiten fol fan De Provincie. Gemeente De Provincie soe yn ien klap grif de meast beprate gemeente fan it lan wêze. Oar idee: Boerekoalstronksteradiel. Wa ken it net? Keppelje dizze geuzenamme no oan de nije gemeente en sjochris wat soks docht foar de populariteit!
 
Sels soe ik dochs in oare kar meitsje. In prachtnamme foar de nije gemeente! Foar minsken dy’t har altiten ôffrege ha wer’t it no krekt leit, kinne wy no dúdlikens jaan: oan de ein fan de Sintrale As, der leit Verweggistan!
 
Graach dien.